هلوسة عراقيــة-1 /المهمـة مستحيلـة !
-يمعود اكعد شوية خلي نتفاهم ....
-ولا اكعد ثانية وحده ، أنت من كل عقلك ...هو هذا بلد ينكعد بيه ...
- أي متكلي شصاير ، شنو جديدة عليك ملاعيب السياسة
- لا ، الجديدة هي البلاوي التي لم يسمع بها أحد ولا خطرت على قلب بشر ....
-راح تكلي البرلمان ، وقادة الاحزاب والحرامية والمفسدين وووو
-قرأت ذات مرة أنه أحنا أول الحضارات التي مهدت لنظرية الحاكم –الآلهة ،ومنذ ذلك الحين فإن من يجلس على العرش يملك البلاد والعباد ...
- وما الجديد في ذلك ؟؟
-الجديد يا عزيزي ، ان الحكام الجدد لم يكتفوا بتشويه الماضي وسرقة الحاضر وحسب ، لا , إنما أسرفوا وابتدعوا طرقاً لتقييد المستقبل ومصادرة الاحلام ..
- أي ، تذكرت ، سمعت الأخبار الجديدة ؟
- ماكو جديد تحت الشمس
-لا أكو ، ملا محيسن يكولون راح لمكبرة الانكليز وخلا ورد على الجنايز...
- أنت قديم ، آني سمعت قرالهم الفاتحة بعد !!!
-زين هي توصل ؟؟
-منو هي ؟
-السورة المباركة
- أي هاي هم دبلوجها هالمرة ، يقال عن احد اكابر وعاظ السلاطين في جمهورية البطيخ أن ثوابها يصل إن قرأت قبلها دعاء الاسغاثة بمناحيم بيغن !
-الى أرواح المؤمنين والمؤمنات (لا سيما من أجتمعنا لأجلهم) وهم الاخوة في الإنسانية الكبرى الذين جُرحت مشاعرهم النبيلة بفعل الإرهاب العراقي الخالص قبل أن تتناثر أجسادهم الطاهرة بعبوات العراقيين الاشرار ،والى جميع الكوا....د والكلـ..ية لا سيما من مات على ولاية بوش الاب وألحقها بولاية الأبن نهدي للجميع ثواب الســـ.....
لقطــــة عرضيـــة . . . (شباك عراقي قديم يطل على منظر بالأبيض والاسود)
جموع المتظاهرين تردد بحماس ....
هاش الزعيم (ي) *** عبد الكريم (ي)
حزب الشيوعي بالحكم *** مطلب عظيم (ي)
رائحة معتقة من أحداث الماضي القريب.....جرائد صفراء ،وجوه صفراء ، حتى (الجواريب) صفراء هي الاخرى ،طبعاً الحذاء الروغان سيد الشاشة ، ولا صوت يعلو على مطالب الشعب . . ..
-عود ليش يخلون ياء أو كسرة بنهاية الأهزوجة ؟
-وين أدري يمكن ضرورة القافية
-بس كان بذاك الوقت أكو نوع من الحرية الاجتماعية والشخصية ، مع نقص في التزويق الإعلامي
-والآن ؟
-هسه أكو جاي وجذب وإعمار وبناء ومقارعة بالفساد ووو
-هاي وين عود ؟
-بالجرايد غير .
-هو وين أكو بعد جرايد
-بس لا هم يصادروها
-رقابة على المطبوعات ، وحجب المواقع على النت ، وبس تحجي على فلاح السوداني تتغلف بليلة ليلاء.
-عايزة بس الفضائيات هم يمنعوها.
-ويجوز نرجع على قناتين أرضيتين حكوميتين (عاويتين) ، الاولى مخصصة للقائد الضرورة .
-والثانية ؟؟
-الثانية بس تدور (الجنل) عليها يطلعلك واحد مشورب يجيبك بزيج ووياه راشدي ويصرخ (دوره لك ) فترجع على الاولى أستر الك.
-على طاري الشوارب واللحى ، لاحظت انه الجماعة اول ما أجو للبلد تشوف اللحايا البيضة والورع والتقوى على وجوههم حتى مرات كان ينكسر خاطري عليهم وعلى سنين (النضال) في بلاد الضباب.
-وهسه ؟
- هسه لا ، هي بدت شوية شوية ، أول ما بداها (دولة) من خفف اللحية نمرتين وضربها قاط صبغ وخفف الشوارب وياها (حتى لا تهتز ولا هم يحزنون) ، تبعه بقية الحاشية بدءاً بالربيعي وانتهاء بوزير الجبهة الداخلية لمقاطعة البربيكان ...
- أي الزلمة أخذها شلع ، ضرب اللحية البيضة نمرة صفر وصبغ الشعر والحواجب ،طلع فانتاستك ...
زين ليش هذا الدجل ؟
- لزوم المرحلة .
-يا مرحلة
-الثورية
-الخاصة بالأمن الوطني لو العالمي ؟
-طز
-بالأمن الوطني ؟
-طز . . .
-لو بالارهاب الدولي؟
-هم طز
- والأحزاب؟
-طز
-بالأحزاب لو بالقادة؟
-طز
-بالأثنين ؟
-طز
-والديمقراطية التوافقية ؟؟
-طز
-بالديمقراطية لو بالتوافق العراقي الإختراع أم بالأثنين معا؟؟
-طز
. . .
(بين يديه ....وردة حمراء ، ورسالة حب قديمة .....وبطاقة الكمية )
هي :تشيح بوجهها عنه حين لم تسعفه بقايا ذكريات الهيام القديم ....
بينما يصيح أبوها بأعلى صوته : اللي ما يكدر يوفر لبنتي (جلكان) بانزين أبو العشرين لتر ، ما يستاهله زوجة !
-حيــــــــــــل ، اليوم الصيفي بالعراق ممل ، سقيم ....طويـــــــــــــــــــــل....
-أطول من يوم السبت .
-أطول من يوم السيادة ...
-أطول من سره البانزين
-أطول من مناقشات برلمان سراييفو
-أطول من معاملة التقاعد
-أطول من مراجعات التعيين
-أطول من المدبلج
-أطول من مسلسل النبي يوسف (ع)
-عود ليش (العوائل) هالأيام ملتهية بمسلسل يوسف الصديق ؟
-أي ، وشكال الفرعون وشحجت زليخة
-هو كم حلقة ويخلص؟
-ما اعرف ...بس ليش ؟
-مو اتذكر شايب قديم كوه قنعنا أنه يصلي ، ومن ذكرنا بقراءة القرآن الكريم لأنه في أواخر عمره (من مواليد زمن نوح) قال : ليش أنتو عبالكم آني ما حافظ القرآن وخاتمه؟
-صدك تحجي عمي ؟
- وداعتكم ،
-زين شنو تحفظ من سورة يوسف؟
-يعني ...(يحك بأذنه) آني مم كلش حافظها حافظها يعني ، بس اني ممكن ألخصها بحجايتين .
-عمي شنو تلخصها ، هو قرآن لو خطاب حكومة الفافون.
- بويه ،هم مو يكولون خذ العبرة ؟
-أي بالله شنو العبرة ؟
-العبرة عمي انه يوسف جان حلو (هيج يوسف حاف لا النبي ولا عليه السلام) وهاي أكو وحدة مرت الوزير (يا وزير؟؟!!) جانت تعشكه ،أنوب نسوان (العكد) ضلن يسولفن بقصتها ويهمبلن على البنية ،كالت زيـــــــــــن آنه إلجــن ...
-أي عمي وبعدين ؟
-عزمتهن على سمج مسكوف (!) وانطت لكل وحده سجينة حادة ،جا موش هو طلع يوسف (هم يوسف حاف) منا وهن كصصن ايديهن !
-ها وبعدين ؟
-كلتلهن هـــــــــــــــا ولجـــــــــــــــن ؟ ها ...................أشو من شفتن الزلمة كمتن أ
. . . . . . . . . . . . . . . . .
-هاي شنو ،يمكن هذا مشهد من ايام صدام .
-ليش ؟
-أي متشوف ، هوسات وركص وشيوخ تبزخ وتهوس والعكل والجفافي تتطاير
-لا يابه لا ، هذا اجتماع (دولة) مع مجلس شيوخ عشائر أسناد صحوة الفضيلية !
-وهاي هم موجودة بالدستور؟
-لا
-لعد شنو أساسها القانوني؟
-ليس لها سند قانوني ولا تشريعي
- . . . . .
-هي بس تكلف ميزانيتنا الانفجارية خمسميت مليون دولار بالشهر ، وبـــــــــــس.
. . . . . . ......................... . . . . .
-هسه عرفت ليش أريد أطفر من هذا البلد
-أعرف بس اريدك تبقى ويايه كم سنة لخ
-ليس يابه ؟
-حتى نسولف للاجيال
-خاف أجيال وتزعل
-ليش؟
-هو وين أكو أجيال بعد .
- شنو أنقرضنا خو ما أنقرضنا
-نحن يا صديقي في الطور الاخير من الإنقراض ، سيصحو البرلمان الموقر ذات يوم ليجدوا أنفسهم دون مواضيع للخلاف والنقاش لأن الشعب قد انقرض ، فلن تجد مكاناً للخلاف بينهم ، القوائم السياسية والانتخابية ستتصالح فيما بينها مصالحتها الكبرى والنهائية لأن سبب خلافهم وهو الشعب الشرير قد ولى الى غير رجعة.
- و(دولة) ؟
- دولة سيسير لأول مرة في شوارع العاصمة بدون حمايات ومسدسات وأسلحة و(سيطيات) وسيمشي من بغداد الى النجف على قدميه ليضع أكليلاً من الزهور.
-هم زين اتذكروا العراقيين .
-عراقيين ؟؟؟؟؟
لا يابه لا هاي وين رحت ، مو طلع قرار رئاسي توافقي قبل كم شهر يقضي بأزالة مقابر العراقيين من الاراضي العراقية وجعل الارض العراقية أرض خالية من الأموات بعد إخلائها بجدارة من الاحياء ، مع تخويل القوات (الصديقة) بحرية دفن شهداء قوات التحالف في الاراضي العراقية كونها من الاراضي التي لا يدفن فيها إلا ذو حظ عظيـــم !
وللحديث بقية إن بقيت الحياة . . .
مشتاق طالب
Mushtaq_t_e@yahoo.com
http://3rdtend.blogspot.com/
